“МЕЙІР-БЕЙС” ЖОҒАРЫ КОЛЛЕДЖІ ЖАҢА ҒИМАРАТТА
Осы аптада Ленгір қаласында жағымды жаңалық орын алды. Негізін медицина ғылымының кандидаты, әлеуметтік қорғау және денсаулық сақтау ісінің үздігі Аманкүл Жанқалова құраған медициналық жоғары колледжінің студенттері мен оқытушылары 3 қабатты еңселі, жарық, кең ғимаратқа көшті. Заманауи үлгіде салынған нысанның материалдық базасы да мықты. Білім алуға қажетті жабдықтар мен құралдар түгелдей бар. Аудиториялар заман ағымына сай әрленіп, компьютер, тақталармен, әдістемелік құралдармен толықтай қамтылыпты. 1400 орындық ғимараттың акт залы мен спорт залы, кітап қоры бай кітапханасы да талапқа жауап береді.
Жастар мен ұстаздардың бос уақытын тиімді өткізуге және саламатты өмір салтын ұстануға жаттығу залы да бар. Онда жаттығуға арналған көптеген жабдықтармен қоса, массаж кереуеті де қойылған. Бұдан, колледж директорының қарамағындағы мұғалімдердің сапалы білім беруі үшін оларға жайлы жағдай жасау қажеттігіне де назар аударғанын көруге болады.
Хош, көздің жауын алатын 4 қабатты (астыңғы қабат асхана мен киім шешетін орын) еңселі, көрікті ғимараттың ашылу салтанатына халық көп жиналды. Ақ кимешекті аналарымыз тәттіден шашу шашып, ыстық бауырсақтарынан дәм татқызса, көпті көрген қазыналды қарттарымыз болашақ жастардың білім алуына, дамуына барша жағдай жасап, колледжін кеңейтіп отырған іскер басшы Аманкүл Мейірханқызына ақ батасын беріп, жастардың мықты маман болып шығуларына тілектестіктерін жеткізді.
Осы іс шараның лентасын Сапарбаев атындағы университетінің ректоры, “Арулар” клубының Президенті Гүлшара Сәрсенғалиқызы Сапарбаева мен Төлеби аудандық ардагерлер кеңесінің төрағасы Әтірхан Шыңғысбаев және ауданның Құрметті азаматы, қадірменді батагөй қариясы Қыстаубай Бектұров қиды. Төлеби аудандық білім бөлімінің басшысы Бекайдар Тойлыбаев пен Түркістан облыстық мәслихатының депутаты, қаламы қарымды журналист Ғалымжан Елшібай да ауданымыздың осындай кереметтей ғимаратпен толығып, көркейіп жатқанына, жастарымыздың білім қуып алысқа кетпей, өз туған жерлерінде өсіп-өркендеп жатқанына ризашылығын білдірді.
Қуанышқа жиналған қонақтар жаңа нысанды аралап көріп, “Мейір-Бейс” жоғары колледжінің өнерпаздары қойған концерттік бағдарламаны тамашалады.
